ᓂᐅᕕᕈᖕᓇᖅᐳᖓ ᐅᐊᐃᓐᓂᒥᒃ ᐅᕝᕙᓘᓐᓂᑦ ᐱᐊᒥᒃ ᓄᓇᓕᒻᓂᑦ?

ᐱᖓᓱᓂᒃ ᐃᓂᓕᐅᖅᓯᒪᔪᑦ ᓄᓇᓖᑦ ᓄᓇᕗᒻᒥᑦ ᐃᒥᐊᓗᐃᑦ ᐱᔭᐅᓯᒪᔪᖕᓇᕐᓂᖏᓐᓄᑦ ᐊᒻᒪᓗ ᐃᒥᖅᑕᐅᓂᐊᕐᓗᑎᒃ. ᓄᓇᓖᑦ ᐃᓚᖏᓐᓂᑦ ᐃᒥᐊᓗᒃᑕᖃᖅᑕᐃᓕᔪᑦ, ᓄᓇᓖᑦ ᑭᒡᓕᖃᖅᑎᑕᐅᔪᓄᑦ ᐱᔪᖕᓇᖅᑎᑕᐅᖃᑦᑕᖅᑐᑦ ᓄᓇᓕᖕᒥᑦ ᐃᒥᐊᓗᐃᑦ ᒥᒃᓵᓄᑦ ᑲᑎᒪᔨᕋᓛᓄᑦ, ᐊᒻᒪᓗ ᑭᒡᓕᖃᙱᑦᑐᓄᑦ ᓄᓇᓕᖕᓂᑦ ᐃᒥᐊᓗᖕᓂᑦ ᓂᐅᕕᕈᖕᓇᕐᓗᑎᒃ ᐊᒻᒪᓗ ᐊᑐᖅᑕᐅᓂᖓ ᒪᓕᖃᑦᑕᖅᑐᑦ ᓄᓇᕗᒻᒥᑦ ᐃᒥᐊᓗᖕᓂᑦ ᐊᐅᓚᑦᑎᓂᕐᒧᑦ ᐱᖁᔭᕐᒧᑦ. ᓄᓇᓕᒃ ᐃᓂᖃᖅᑎᑕᐅᔪᖅ ᓄᓇᓕᖕᒥᐅᓄᑦ ᓂᕈᐊᖅᑕᐅᖃᑦᑕᖅᑐᑦ.

ᒐᕙᒪᒃᑯᓐᓄᑦ ᐊᐅᓚᑕᐅᔪᒥᒃ ᐅᐊᐃᓂᓂᒃ ᐊᒻᒪᓗ ᐱᐊᓂᒃ ᓂᐅᕕᕐᕕᒃᑕᖃᖅᑐᖅ ᐃᖃᓗᖕᓂᑦ. ᐃᒥᐊᓗᐃᑦ ᓇᖕᒥᓂᕐᒧᑦ ᓂᐅᖅᖃᖅᑕᐅᓂᐊᖅᑐᑦ ᑎᑭᓴᖅᑕᐅᔭᕆᐊᖃᖃᑦᑕᖅᑐᑦ ᓄᓇᕗᒻᒥ ᐃᒥᐊᓗᓕᕆᔨᒃᑯᓐᓂᑦ ᐅᕝᕙᓘᓐᓃᑦ ᑎᑭᑎᑕᐅᓗᑎᒃ ᐱᔪᖕᓇᖅᑎᑦᑎᔾᔪᑎᒃᑯᑦ ᐳᒥᑦᑯᑦ.