ᐊᔪᙱᓐᓂᖃᕐᓂᕐᒧᑦ ᐱᕙᓪᓕᐊᓂᖅ
ᐱᓕᕆᔨᓄᑦ ᐊᖏᖃᑎᒌᒍᑎ, ᓈᒻᒪᒋᔭᐅᓚᐅᖅᑐᖅ ᒪᓐᓃᑦ 2008-ᒥᑦ ᓄᓇᕗᒻᒥ ᒐᕙᒪᒃᑯᓐᓄᑦ ᐊᒻᒪᓗ ᓄᓇᕗᒻᒥ ᐱᓕᕆᔨᓄᑦ ᑲᑐᔾᔨᖃᑎᒌᒃᑯᓐᓄᑦ, ᐱᑕᖃᖅᑐᖅ ᐊᕐᕌᒍᑕᒫᒃᑯᑦ ᐃᓕᔭᐅᓂᕐᓄᑦ ᑮᓇᐅᔭᓂᒃ ᐃᑲᔪᖅᑐᓂᒃ ᓇᔭᙳᐊᓂᒃ ᑮᓇᐅᔭᓂᒃ ᐊᑐᕐᓂᖏᓐᓄᑦ ᐱᔾᔪᑎᖃᖅᑐᓂᒃ ᐊᔪᙱᓐᓂᖅᑖᕐᓂᕐᒧᑦ ᐱᕙᓪᓕᐊᓂᕐᒧᑦ.
ᓄᓇᕗᒻᒥ ᒐᕙᒪᒃᑯᑦ ᑐᓂᓯᖃᑦᑕᖅᑐᑦ ᐱᒋᐊᕐᓗᑎᒃ $3,000-ᓂᑦ ᑎᑭᓪᓗᒍ $6,330-ᓄᑦ ᐅᑭᐅᑕᒫᒃᑯᑦ ᐊᑐᓂ ᓇᔭᙳᐊᓄᑦ ᐃᑲᔪᕐᓂᐊᖅᑐᒥᒃ ᐊᔪᙱᓐᓂᖅᑖᕐᓂᕐᒧᑦ ᐱᕙᓪᓕᐊᓂᕐᒧᑦ ᑮᓇᐅᔭᓄᑦ ᐊᑐᖅᑕᖏᓐᓄᑦ. ᐊᔾᔨᒌᙱᓐᓂᐅᔪᖅ ᑕᑯᒃᓴᐅᑎᑦᑎᔪᖅ ᐊᔾᔨᒌᙱᑦᑐᑦ ᐊᑭᐅᔪᓄᑦ ᐃᖏᕐᕋᔭᖕᓂᕐᒧᑦ ᓄᓇᓕᖕᓂᑦ ᑮᓇᐅᔭᐃᑦ ᐱᔭᐅᔭᕆᐊᖃᖅᐸᑕ ᐃᖏᕐᕋᔭᒋᐊᖃᕐᓗᑎᒃ ᑲᑎᒪᔪᓄᙵᐅᓗᑎᒃ ᐃᓕᓐᓂᐊᕆᐊᕐᓗᑎᒡᓘᓐᓃᑦ ᓯᓚᑖᓄᑦ ᓄᓇᕗᑦ.
ᐃᓕᓐᓂᐊᖅᑐᑦ ᐃᓄᐃᑦ ᐅᕝᕙᓘᓐᓃᑦ ᓄᓇᖃᖅᖄᖅᑐᓂᑦ ᓯᕗᓕᖃᖅᑐᑦ ᐃᓕᑕᕆᔭᐅᔾᔪᑎᑖᕐᓗᑎᒃ ᐋᓐᓂᐊᖃᖅᑕᐃᓕᒪᕐᓂᕐᒧᑦ ᐃᓕᓐᓂᐊᖅᑐᑦ ᐆᒃᑐᕈᖕᓇᖅᑐᑦ ᑐᒃᓯᕋᐅᓯᐅᕐᓗᑎᒃ ᑮᓇᐅᔭᓄᑦ ᐃᑲᔪᖅᑕᐅᔾᔪᑎᓂᒃ ᐊᒻᒪᓗ ᐃᓕᓐᓂᐊᖅᑎᓄᑦ ᑮᓇᐅᔭᐃᑦ ᐃᓕᑕᕆᔭᐅᔾᔪᑎᓄᑦ.
ᑮᓇᐅᔭᐃᑦ ᐊᑐᖅᑕᐅᔪᖕᓇᕐᒥᔪᑦ ᐊᑭᐅᔪᓄᑦ ᐅᖓᓯᒃᑐᒥᑦ ᐃᓕᓐᓂᐊᕆᐊᖃᕐᓂᕐᒧᑦ ᐊᒻᒪᓗ ᖃᕆᑕᐅᔭᒃᑯᑦ ᐃᓕᓐᓂᐊᕐᓂᕐᒧᑦ. ᓄᓇᕗᒻᒥᑦ ᓄᓇᓕᓗᒃᑖᑦ ᐱᖃᑦᑕᕈᖕᓇᓕᖅᑐᑦ ᐱᐊᓚᔪᒥᒃ ᖃᕆᑕᐅᔭᒃᑰᕈᖕᓇᐅᑎᒥᑦ. ᐊᒥᓱᙳᕆᐊᖅᓯᔪᖅ ᓄᓇᕗᒻᒥᐅᑕᐃᓂᒃ ᐊᑐᕈᖕᓇᕐᓂᐊᕐᓗᑎᒃ ᐊᔪᙱᓐᓂᕐᒥᒃ ᐱᕙᓪᓕᐊᓂᕐᒧᑦ ᑐᕌᖓᔪᓂᒃ ᖃᕆᑕᐅᔭᒃᑯᑦ.
