ᐆᒪᓂᖃᖅᑐᖅ

ᐃᓅᓯᖃᕐᓂᖅ ᐊᖏᔫᔪᒥᑦ, ᐱᑦᑕᐅᔪᒥᑦ ᓄᓇᒥᑦ ᐃᑲᔪᖅᑐᐃᔪᖅ ᐃᖕᒥᓂᒃ ᐊᔪᙱᓐᓂᕐᒧᑦ ᐊᒻᒪᓗ ᐃᖕᒥᒃᑰᖓᓂᕐᒧᑦ ᐊᑕᐅᑦᑎᒃᑯᑦ ᑕᑯᒃᓴᐅᑎᑦᑎᑉᓗᓂ ᐃᓅᓯᖃᕐᓂᐊᕐᓗᓂ ᖃᓂᓐᓂᖅᓴᐅᓗᓂ ᓄᓇᒧᑦ. ᐊᑕᐅᑦᑎᒃᑯᑦ, ᐃᓕᓐᓂᐊᖅᑎᑦᑎᔪᖕᓇᖅᑐᖅ ᑭᑐᓗᒃᑖᓂᒃ ᑕᒡᕙᓂᕐᒥᐅᑕᐅᔪᓂᒃ ᖃᓄᖅ ᐊᑐᖃᑦᑕᕐᒪᖔᑉᑕ ᐅᕙᑉᑎᖕᓄᑦ ᐊᒻᒪᓗ ᖃᓄᖅ ᐅᕙᒍᑦ ᐱᒻᒪᕆᐅᓗᑕ ᐃᓚᒋᔭᐅᔪᖕᓇᕐᒪᖔᑉᑕ ᓄᓇᓕᖕᒧᑦ.

ᓄᓇᕗᑦ ᓂᒋᖅᐸᓯᒃᑐᒥᑦ ᑲᓇᑕᑎᑑᖏᑦᑐᖅ. ᑭᑐᓗᒃᑖᓄᑦ ᓅᑦᑐᓄᑦ ᓄᓇᕗᒻᒧᑦ, ᐊᒥᓱᐃᑦ ᐃᓕᑕᐅᔭᕆᐊᖃᖅᑐᑦ. ᓅᓪᓗᓂ ᓄᓇᕗᒻᒧᑦ ᐃᓚᖏᓐᓂᑦ ᐊᖏᔪᒥᒃ ᐃᓅᓯᕐᒧᑦ ᐱᖅᖁᓯᕆᔭᐅᔪᒥᒃ ᐊᓯᐊᙳᖅᓯᓂᖃᕆᐊᖃᕐᓇᖅᑐᖅ ᐊᒻᒪᓗ ᐃᓚᖏᓐᓂᑦ ᐊᔪᕆᓐᓂᖃᕆᐊᖃᕐᓗᓂ, ᑭᓯᐊᓂ ᖁᕕᐊᓇᕐᓂᒥᒃ ᑐᓂᔭᐅᓃᑦ, ᑕᑯᔭᖅᑐᐃᓃᑦ, ᐱᓕᕆᖃᑎᒌᖕᓃᑦ ᐊᒻᒪᓗ ᐊᔪᙱᓐᓂᕐᒧᑦ ᐊᒃᓱᕈᕐᓇᖅᑐᑦ ᖃᓄᐃᖏᑎᑦᑎᔪᑦ.

ᐃᓚᒋᔭᐅᔪᒥᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᑕᖅᑕᕐᕕᖕᒥᑦ ᐃᓗᓕᖃᖅᑐᖅ ᑐᑭᓯᐅᒪᔾᔪᑎᓂᒃ ᐃᑲᔪᕐᓂᐊᖅᑐᓂᒃ ᖃᐅᔨᒪᓕᖅᑎᑦᑎᓂᕐᒧᑦ ᓄᑖᓂᒃ ᐱᓕᕆᔨᓂᑦ ᐱᓕᕆᐊᓄᑦ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᓐᓂᑦ.

ᐊᑐᖅᑕᐅᔪᖅ ᐅᖃᐅᓯᖅ

ᓄᓇᕗᒻᒥ ᐱᖓᓱᓂᒃ ᐊᑐᖅᑕᐅᔪᓂᒃ ᐅᖃᐅᓯᖃᖅᑐᖅ - ᐃᓄᐃᑦ ᐅᖃᐅᓯᖓᑦ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᑉᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ -ᑎᑎᕋᖅᓯᒪᓂᖓᑐᑦ ᓄᓇᕗᒻᒥᑦ ᐊᑐᖅᑕᐅᔪᑦ ᐅᖃᐅᓯᕐᓄᑦ ᐱᖁᔭᕐᒥᑦ. ᒪᕐᕉᒃ ᐊᑐᖅᑕᐅᓛᖑᖃᑦᑕᖅᑐᑦ ᐃᓄᐃᑦ ᐃᖃᐅᓯᖓᑦ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ.

ᐃᓄᐃᑦ ᐅᖃᐅᓯᖓᑦ ᒥᐊᓂᕆᔭᐅᔪᖅ ᐃᓕᔭᐅᓯᒪᔪᓂᒃ ᐊᑉᓯᒪᔪᒥᑦ ᐃᓄᐃᑦ ᐅᖃᐅᓯᖓᓂᒃ ᒥᐊᓂᖅᓯᓂᕐᒧᑦ ᐱᖁᔭᕐᒧᑦ, ᐃᓄᐃᑦ ᐅᖃᐅᓯᖏᓐᓂᒃ ᐱᖃᖅᑎᑦᑎᔪᖅ — ᐃᓚᐅᑉᓗᑎᒃ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ — ᓴᙱᓛᖑᔪᒥᒃ ᒥᐊᓂᕆᔭᐅᓂᖏᓐᓄᑦ ᑲᓇᑕᒥᑦ ᓄᓇᖃᖅᖄᖅᑐᑦ ᐅᖃᐅᓯᖏᓐᓂᑦ. ᐃᓄᐃᑦ ᐅᖃᐅᓯᖓᓂᒃ ᒥᐊᓂᖅᓯᓂᕐᒧᑦ ᐱᖁᔭᖅ ᓇᓗᓇᐃᖅᓯᔪᖅ ᐱᔨᑦᑎᕋᐅᑎᐅᔪᑦ ᑕᒪᐃᓐᓄᑦ ᑭᑐᑐᐃᓐᓇᓄᑦ ᐊᒻᒪᓗ ᓇᖕᒥᓂᖃᖅᑐᓄᑦ ᑐᓂᔭᐅᓂᐊᕐᒪᑕ ᐃᓄᐃᑦ ᐅᖃᐅᓯᖓᓐᓂᒃ ᐊᑐᕐᓗᑎᒃ.

ᐱᖁᔭᖅ ᓇᓗᓇᐃᖅᓯᔪᖅ ᒪᕐᕉᖕᓂᒃ ᐅᖃᐅᓯᓖᑦ ᐃᓄᐃᑦ ᐱᔨᑦᑎᖅᑕᐅᓂᐊᕐᒪᑕ ᐅᖃᐅᓯᕐᒥᒃ ᐊᑐᕈᒪᔭᖓᓐᓂᑦ ᐊᑐᕐᓗᑎᒃ. ᒪᓕᒐᖅ ᐱᕕᖃᖅᑎᑦᑎᔪᖅ ᑭᑐᓗᒃᑖᓂᒃ — ᐃᓚᐅᑉᓗᑎᒃ ᒐᕙᒪᒃᑯᑦ, ᐱᓕᕆᐊᓖᑦ ᐊᒻᒪᓗ ᓄᓇᓕᖕᒥᑦ ᐊᐅᓚᑦᑎᔨᓂᑦ ᑲᑐᔾᔨᖃᑎᒌᓂᑦ — ᐊᑐᑐᐃᓐᓇᐅᓕᖁᑉᓗᒋᑦ ᐃᓄᐃᑦ ᐅᖃᐅᓯᖏᓐᓂᒃ ᐊᑐᕐᓗᑎᒃ ᐱᔨᑦᑎᕋᕐᓂᐊᕐᓗᑎᒃ.

ᐃᑲᔪᐃᓂᖃᕈᖕᓇᖅᑐᖅ ᖃᐅᔨᒪᓗᓂ ᐅᖃᓪᓚᒍᖕᓇᕐᓂᕐᒥᒃ ᐃᓄᒃᑎᑐᑦ ᐅᕝᕙᓘᓐᓃᑦ ᐃᓄᐃᓐᓇᖅᑐᓐ. ᐃᓕᓐᓂᐊᖅᐸᓪᓕᐊᔪᒪᒍᕕᑦ, ᐅᕗᙵᕐᓗᑎᑦ: ᐃᓄᒃᑐᑦ ᑐᓵᓚᖓ - http://www.tusaalanga.ca/