ᑕᑯᔪᒪᓂᕐᒧᑦ ᐃᖏᕐᕋᔭᖕᓂᖅ

ᓄᓇᕗᑦ ᐊᒥᓱᓄᑦ ᐃᓱᒪᒋᔭᐅᔪᖅ ᐃᓚᒋᔭᐅᓂᖓᓄᑦ ᑭᖑᓪᓕᖅᐹᖑᑉᓗᓂ ᑭᒡᓕᓕᐅᖅᑕᐅᓂᖓᓄᑦ, ᐃᓅᓯᖅ ᓄᓇᕗᒻᒥᑦ ᐊᔾᔨᐅᖏᑦᑑᑉᓗᓂ ᐊᒻᒪᓗ ᐱᑦᑕᐅᑦᑎᐊᖅᖢᓂ.

ᑕᒪᓗᒃᑖᕐᓚᒃ ᓄᓇᕗᑦ ᐅᖓᑖᓅᖅᓯᒪᔪᖅ ᓇᐹᖅᑐᓄᑦ ᑭᒡᓕᐅᔪᓂᑦ, ᓇᐹᖅᑐᖃᓗᐊᖏᑦᑎᐊᖅᖢᓂ. ᐊᐅᔭᒃᑯᑦ ᓯᕿᓂᖃᐃᓐᓇᖃᑦᑕᕐᓂᖓ ᐱᑦᑕᐅᔫᑉᓗᓂ ᐅᑭᐅᒃᑯᑦ ᐱᖅᓯᖃᑦᑕᕐᓂᖓ ᓴᙱᔫᒋᑉᓗᓂ. ᓄᓇᕗᑦ ᓄᓇᐅᔪᖅ ᐊᔾᔨᒌᙱᑦᑑᑎᐅᑉᓗᓂ, ᓄᓇᖓᓂᑦ, ᓂᕐᔪᑎᖏᓐᓂᑦ, ᐅᑭᐅᑉ ᐃᓚᖏᓐᓂᑦ ᐊᒻᒪᓗ ᐃᓄᖏᓐᓂᑦ.

ᑕᑯᔪᒪᔪᓄᑦ ᐊᒃᓱᕈᕐᓇᖅᑐᒃᑰᕐᓗᑎᒃ ᐊᔪᙱᓐᓂᖃᕐᓂᒃᑯᑦ ᐊᒻᒪᓗ ᓇᖕᒥᓂᕐᒧᑦ, ᓄᓇᕗᑦ ᓈᒻᒪᑦᑎᐊᖅᑐᖅ ᐃᓅᓯᖃᕐᕕᒋᓂᐊᕐᓗᒍ. ᐊᑐᓂ ᐊᕕᒃᑐᖅᓯᒪᔪᖏᑦ ᓇᖕᒥᓂᖅ ᐱᖃᕐᓂᕋᖃᑦᑕᖅᑐᓂᒃ ᐱᐅᑦᑎᐊᕐᓂᕐᒥᒃ, ᐊᒻᒪᓗ ᐊᒥᒐᙱᑦᑐᓂᒃ ᕿᒥᕐᕈᔭᐅᔪᖕᓇᖅᑐᖃᖅᖢᑎᒃ.

ᓄᓇᕗᑦ ᐊᖏᕐᕋᕆᔭᐅᔪᖅ ᓂᕐᔪᑎᓄᑦ ᑐᑭᐅᑎᔭᐅᖃᑦᑕᕐᓂᐅᔪᓂᒃ, ᐱᑦᑕᐅᑦᑎᐊᖅᑐᓂᒃ ᑎᖕᒥᐊᓂᒃ ᑕᐅᑐᒍᖕᓇᕐᓗᑎᒃ, ᐱᑦᑕᐅᑦᑎᐊᖅᑐᓂᒃ ᒥᕐᖑᐃᖅᓯᕐᕕᖃᖅᖢᓂ, ᑕᖕᒫᕐᕕᖕᓂᑦ ᐊᒻᒪᓗ ᐱᓱᓕᒡᕕᖕᓂᑦ, ᐅᒥᐊᖅᑐᕐᕕᐅᔪᖕᓇᖅᑐᖅ ᐊᒻᒪᓗ ᖃᔭᖅᑐᕐᕕᐅᓗᓂ, ᐃᖃᓗᑦᑎᐊᕙᖕᓂᑦ, ᐊᒻᒪᓗ ᖃᐅᔨᒪᔭᐅᑦᑎᐊᖅᑐᓂᒃ ᓴᓇᙳᐊᖅᓯᒪᔪᓂᒃ ᐊᒻᒪᓗ ᐱᖅᖁᓯᕐᒥᑦ. 

ᑐᑭᓯᐅᒪᔾᔪᑎᒃᑲᓐᓂᕐᓂᒃ ᒥᕐᖑᐃᖅᓯᕐᕖᑦ ᒥᒃᓵᓄᑦ ᐱᔪᒪᒍᕕᑦ ᐅᕗᙵᕐᓗᑎᑦ http://www.nunavutparks.com/

ᕿᑭᖅᑖᓗᒃ

ᕿᑭᖅᑖᓗᒃ ᐊᖏᕐᕋᕆᔭᐅᔪᖅ ᐃᖃᓗᖕᓄᑦ, ᓄᓇᕗᑦ ᓄᓇᓕᐸᐅᔭᖓᓄᑦ — ᐊᒻᒪᓗ ᑖᒻᓇᑐᐊᖅ — ᓄᓇᓕᐸᐅᔭᐅᔪᖅ. ᐊᕕᒃᑐᖅᓯᒪᔪᒥᑦ ᐱᑕᖃᐅᖅᑐᖅ ᐱᑦᑕᐅᔪᓂᒃ ᐊᒻᒪᓗ ᑕᑯᔭᖅᑐᖅᑕᐅᔪᖕᓇᖅᑐᓂᒃ ᓂᕆᐅᒋᔭᐅᔪᓂᒃ ᐅᑭᐅᑕᖅᑐᒥᑦ.

ᐅᑭᐅᒃᑯᑦ, ᐊᒥᓱᑦ ᐃᓄᐃᑦ ᑕᐃᑯᙵᐅᖃᑦᑕᖅᑐᑦ ᖁᐊᖅᓯᒪᔪᒥᑦ ᓄᓇᒧᑦ ᐊᒻᒪᓗ ᐃᒪᖏᓐᓄᑦ ᕿᒧᒃᓯᒃᑯᑦ ᐊᒻᒪᓗ ᓯᑭᑑᒃᑯᑦ ᓄᓇᒃᑯᑦ ᐊᒻᒪᓗ ᐃᒪᒃᑯᑦ. ᓄᓇᓕᐊᖅᑕᕐᓃᑦ ᓄᓇᕐᔪᐊᕐᒥᑦ ᐊᓕᐊᓇᐃᒋᔭᐅᔪᑦ ᐱᑦᑕᐅᔫᔪᓂᒃ ᖃᖅᖃᖃᖅᖢᓂ, ᓯᕐᒥᓕᖕᓂᑦ, ᐱᖃᓗᔭᕐᓂᑦ, ᑎᖕᒥᐊᑦ ᐃᓂᖏᓐᓂᑦ ᐃᒻᓈᕈᓂᑦ ᐊᒻᒪᓗ ᑕᕆᐅᕐᒥᐅᑕᐃᑦ ᓂᕐᔪᑎᓂᑦ.

ᐅᑭᐅᒃᑯᑦ ᐃᒃᑮᕐᓇᑦᑎᐊᖃᑦᑕᖅᑐᖅ, ᓴᙱᔪᓂᒃ ᐊᓄᕆᑐᔪᓂᑦ ᐊᒻᒪᓗ ᐱᖅᓯᖃᑦᑕᖅᑐᓂᒃ, ᑭᓯᐊᓂ ᐊᒥᓱᓄᑦ, ᓈᒻᒪᒃᑐᖅ ᐊᑐᖅᑕᐅᓂᖓ ᐱᑦᑎᐊᑦᑎᐊᕐᓂᖓᓄᑦ ᐊᐱᓯᒪᑉᓗᓂ ᓄᓇ, ᕿᓚᒃ ᐊᒥᓱᑦᑎᐊᓂᒃ ᐅᑉᓗᕆᐊᖃᐅᖅᖢᓂ, ᐊᒻᒪᓗ ᓲᖃᐃᒻᒪ ᐊᖅᓴᓕᔮᓂᑦ. ᐊᐅᔭᒃᑯᑦ ᑲᔾᔮᕐᓇᖅᑐᖅ, ᓯᕿᓂᖅ ᑕᐃᒪᐅᖏᓐᓇᖃᑦᑕᖅᖢᓂ, ᑕᕆᐅᒃᑯᑦ ᖃᔭᒃᑐᑲᑕᒡᓗᑎᒃ, ᐃᖃᓪᓕᐊᕈᔾᔭᐅᓗᑎᒃ, ᑑᒑᓕᖕᓂᑦ ᑕᐅᑐᕋᓐᓇᕆᐊᖅᑐᕐᓗᑎᒃ ᐊᒻᒪᓗ ᐱᖓᓲᔪᓄᑦ ᒥᕐᖑᐃᖅᓯᕐᕕᖕᓄᑦ ᓄᓇᕗᒻᒦᑦᑐᓂᑦ.

ᕿᑎᕐᒥᐅᑦ

ᐃᓂᐅᔪᖅ ᐱᑕᖃᐅᑦᑎᐊᖅᑐᖅ ᐱᖅᖁᓯᕐᒥᑦ ᐊᒻᒪᓗ ᐱᓐᓂᑯᒥᒃ. ᐱᑕᖃᐅᖅᑐᖅ ᐊᔾᔨᒌᙱᑦᑑᑎᓂᑦ ᐃᓄᖕᓂᑦ ᐱᑦᑕᐅᑦᑎᐊᖅᑐᒥᑦ ᓄᓇᒥᐅᑕᓂᒃ, ᐱᑕᖃᐅᖅᑐᒥᒃ ᐊᔾᔨᐅᖏᑦᑐᓂᒃ ᓂᕐᔪᑎᓂᒃ, ᐊᔾᔨᒌᖓᔪᒃᑯᑦ ᑕᑯᔭᐅᔪᖕᓇᖅᑐᓂᑐᐊᖅ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ.

ᐃᓄᐃᑦ ᑕᐃᑲᓂᕐᒥᐅᑕᐅᔪᑦ ᐊᑐᖃᑦᑕᕈᖕᓇᖅᑐᑦ ᐊᑐᓚᐅᖅᓯᒪᙱᑕᖏᓐᓂᑦ. ᐅᑎᕐᕕᒋᔪᖕᓇᖅᑕᖏᑦ ᐊᑐᓚᐅᖅᑕᖏᑦ ᐊᓯᖏᓐᓄᑦ ᐱᓐᓂᑯᒋᔭᐅᔪᓂᑦ ᕿᓂᕋᓱᒃᑐᓂᑦ ᑕᓪᓗᕈᑎᒃᑯᑦ ᑦᓴᐃᓃᓰᑦ ᓄᓈᙵᐅᔪᒥᒃ. ᑕᓪᓗᕈᑎᒃ, ᖃᐅᔨᒪᔭᐅᖏᑦᑎᐊᓚᐅᖅᑐᖅ, ᐊᑐᖅᑕᐅᖃᑦᑕᖅᓯᒪᔪᖅ ᐃᓄᖕᓄᑦ ᑕᒫᓂᑦ ᕿᓰᑦ ᐅᒥᐊᒃᑯᑦ, ᐊᖏᓂᖅᓴᐃᑦ ᐅᒥᐊᒃᑯᑦ, ᐃᑯᒪᓅᖅᑐᓄᑦ ᐅᒥᐊᒃᑯᑦ ᐊᒻᒪᓗ ᓯᑭᑑᒃᑯᑦ.

ᑕᑯᔭᖅᑐᐃᔪᑦ ᑕᑯᔭᐅᖃᑦᑕᕐᒥᔪᑦ ᐃᖏᕐᕋᔭᒃᑐᑦ ᐊᕕᒃᑐᖅᓯᒪᔫᑉ ᐱᐅᑦᑎᐊᖅᑐᖏᓐᓂᑦ ᑰᖏᓐᓂᑦ, ᓄᓇᑐᐃᓐᓇᐃᑦ ᖃᐅᔨᑎᑦᑎᑉᓗᑎᒃ ᐊᒪᕈᖅᑕᖃᐅᖅᑐᓂᑦ, ᐊᒃᖤᓂᑦ, ᐅᒥᖕᒪᖕᓂᑦ, ᑎᕆᒐᓂᐊᓂᑦ ᐊᒻᒪᓗ ᑐᒃᑐᓂᑦ. ᓄᓇ ᑕᐅᓯᓐᖏᓐᓃᑦᑐᓂᑦ ᑕᓯᕋᔭᒃᑕᖃᐅᖅᑐᖅ ᐊᒻᒪᓗ ᑕᓯᕐᓂᑦ. ᕿᑎᕐᒥᐅᓂᑦ ᐊᖏᕐᕋᕆᔭᐅᖕᒥᔪᖅ ᑎᖕᒥᐊᖃᕐᕕᖕᒧᑦ, ᓂᕐᔪᑎᖃᕐᕕᖕᒧᑦ ᐊᒻᒪᓗ ᒥᕐᖑᐃᖅᓯᕐᕕᖕᒧᑦ.

ᑭᕙᓪᓕᖅ

ᑭᕙᓪᓕᖅ, ᐱᑦᑕᐅᔪᐊᓗᐃᑦ ᓯᒡᔭᖓᓃᑦᑐᖅ ᑕᓯᐅᔭᕐᔪᐊᑉ, ᐅᖃᖃᑦᑕᖅᑐᑦ ᑲᓇᑕᐅᑉ ᕿᑎᐊᓃᖓᓂᕋᕐᓗᑎᒃ.

ᐃᓂᑦᑎᐊᕙᐅᔪᖅ ᑭᓇᑐᐃᓐᓇᕐᒧᑦ ᐃᓅᓯᖃᕈᒪᔪᒥᒃ ᐊᑐᖅᑕᐅᕙᒃᑐᒥᑦ ᐊᒻᒪᓗ ᐊᑐᕐᓂᑯᖃᓕᕐᓗᑎᒃ ᐃᓚᖓᓐᓂᑦ ᓄᓇᐅᑉ ᐆᒪᔪᕐᔪᐊᖏᓐᓄᑦ ᖃᓂᓪᓗᒋᑦ ᐊᒻᒪᓗ ᐃᖕᒥᓅᖓᓗᑎᒃ. ᑕᐃᑲᓂᕐᒥᐅᑕᐅᔪᑦ ᓂᑉᓕᕐᓂᖅ ᐊᔪᓕᖃᑦᑕᖅᑐᖅ ᑕᐅᑐᒃᑎᓪᓗᒋ ᕿᓇᓗᒐᕐᓂᑦ ᑕᕆᐅᕐᒥᑦ ᐅᕝᕙᓘᓐᓃᑦ ᓄᓇᒦᖦᖢᑎᒃ, ᑕᑯᑉᓗᑎᒃ ᓇᓄᕐᓂᒃ ᓯᓈᓕᐊᖅᓯᒪᑎᓪᓗᒋᑦ, ᐅᕝᕙᓘᓐᓃᑦ ᑐᒃᑐᐃᑦ ᐊᒥᕐᕋᓂᒃ ᐊᑉᖁᓵᖅᓯᒪᔪᓂᒃ.

ᑭᒡᓕᐊᓂᑦ ᓄᓇᑦᑎᐊᕐᒧᑦ ᑏᓛᓐ ᓂᕐᔪᑎᖃᕐᕕᒃ ᐃᓚᐅᑉᓗᓂ ᑏᓛᓐ ᑰᖑᔪᑦ ᐊᒻᒪᓗ ᒥᐊᓂᖅᓯᔪᑦ ᑐᒃᑐᐃᑦ ᐊᑉᖁᓵᖅᑎᓪᓗᒋᑦ ᐊᑉᖁᑎᖏᓐᓂᑦ ᐊᒻᒪᓗ ᓇᐹᖅᑐᓕᐅᑉ ᐃᓱᐊᓂᑦ ᓂᒋᐊᓂᑦ ᐅᑭᐅᑕᖅᑐᒥᑦ ᓯᒡᔭᒧᑦ.