• English
  • Français
  • Inuinnaqtun

ᓄᓇᕗᒻᒥ ᐋᓐᓂᐊᓯᐅᖅᑏᑦ ᖁᓪᓕᖅᐸᐅᕗᑦ ᐃᖢᐊᖅᓴᐃᔾᔪᑎᓂᒃ ᐱᔨᑦᓯᕋᖅᑎᐅᕙᑦᑐᓂᒃ.

ᕿᑭᖅᑕᓂ ᐋᓐᓂᐊᕐᕕᖓ ᐃᖃᓗᓐᓂ 35-ᓂᒃ ᐃᓪᓕᓕᒃ.

ᐃᖅᑲᓇᐃᔮᑦ

ᓄᓇᕗᒻᒥ ᐊᔾᔨᒌᓐᖏᑐᒻᒪᕆᐅᔪᓂᒃ ᐃᖅᑲᓇᐃᔮᒃᓴᖅᑕᓕᒃ ᐃᖅᑲᓇᐃᔮᒻᒪᕆᓐᓂᒃ, ᐃᓱᓕᑦᑕᕐᕕᖃᓐᖏᑦᑐᓂᒃ ᐊᒻᒪᓗ ᐃᖅᑲᓇᐃᔭᓚᐅᐱᓪᓚᖃᑦᑕᕈᒪᔪᓄᑦ ᐋᓐᓂᐊᓯᐅᖅᑎᐅᓂᕐᒥᒃ ᒪᓂᒪᑎᑕᐅᔪᑦ. ᒪᓂᒪᑎᑕᕗᑦ ᐋᓐᓂᐊᓯᐅᖅᑎᐅᓂᖅ ᐋᓐᓂᐊᕐᕕᖁᑎᑦᑎᓐᓂ ᐊᒻᒪᓗ ᐅᖁᒪᐃᓐᓂᓂᐊᕐᕕᖕᒥ ᐃᖃᓗᓐᓂ, ᐊᕕᑦᑐᖅᓯᒪᓂᕐᓂ ᑐᖅᑲᑕᕐᕕᖁᑎᒋᔭᑦᑎᓐᓂ ᐋᓐᓂᐊᕐᕖᖕᓂ ᑲᖏᕐᖠᓂᕐᒥ ᐃᖃᓗᑦᑑᑦᑎᐊᒥᓗ ᐊᒻᒪᓗ ᓄᓇᓕᓐᓂ ᐋᓐᓂᐊᕐᕕᖕᓂ.

ᓄᓇᓕᓐᓂ ᐋᓐᓂᐊᓯᐅᖅᑎ

ᓄᓇᓕᓐᓂ ᐋᓐᓂᐊᓯᐅᖅᑎ ᐃᑲᔪᖃᑦᑕᖅᑐᖅ ᐃᑲᔪᖅᑕᐅᔭᕆᐊᓕᓐᓂᒃ ᐱᕚᓪᓕᕈᑎᒃᓴᓂᒃ, ᓴᐳᔾᔨᓯᒪᓂᕐᒥᒃ ᐊᒻᒪᓗ ᐅᑎᖅᑎᑦᓯᕙᓪᓕᐊᓇᓱᐊᕐᓂᕐᒧᑦ ᖃᓄᐃᓐᖏᓚᐅᕐᓂᖏᓐᓄᑦ. ᓄᓇᓕᓐᓂ ᐋᓐᓂᐊᓯᐅᖅᑎ ᐊᑐᐃᓐᓇᐅᑎᑦᓯᕙᑉᐳᖅ ᓄᓇᓕᓐᓂ ᐃᖢᐊᖅᓴᐃᒍᑎᓂᒃ ᑲᑐᔾᔨᖃᑎᖃᖅᑐᓂ ᐋᓐᓂᐊᕕᖕᓂ ᐃᖢᐊᖅᓴᐃᔨᓂᒃ. ᐃᓱᒪᒃᓴᖅᓯᐅᕈᑕᐅᔪᓐᓇᖁᓪᓗᑎᑦ ᓄᓇᓕᓐᓂ ᐃᖢᐊᖅᓴᐃᔨᐅᓂᕐᒥᒃ, ᐃᓕᓴᕆᔭᐅᔾᔪᑎᒻᒪᕆᑦᑖᕆᐊᖃᖅᑐᑎᑦ ᖃᐅᔨᓴᕐᓂᓕᕆᓂᕐᒥᒃ ᐋᓐᓂᐊᓯᐅᖅᑎᓄᑦ (BScN) ᐅᕝᕙᓘᓐᓃᑦ ᐊᖏᖅᑕᐅᓯᒪᔪᓂᒃ ᓇᓕᒧᖏᓐᓂᒃ ᖃᐅᔨᒪᓂᐅᔭᕆᐊᓕᓐᓂᒃ, ᐃᓚᖃᕐᓗᓂ ᒥᑦᓯᑎᓐᓃᖏᑦᑐᓂᒃ ᐊᑕᐅᓯᕐ ᒪᕐᕉᓘᓐᓃᑦ ᐊᕐᕌᒎᒃ ᐊᑐᖅᓯᒪᓗᑎᒃ ᐋᓐᓂᐊᓯᐅᖅᑎᓂᒃ ᐱᓕᕆᖃᑎᖃᖅᓯᒪᓂᕐᒥᒃ ᐊᒻᒪᓗ ᐋᓐᓂᐊᓯᐅᖅᑎᐅᓯᒪᓗᑎᑦ ᐃᖢᐊᖅᓴᐃᓂᒻᒪᕆᒻᒥᒃ ᐋᓐᓂᐊᕕᓪᓚᑦᑖᒥ ᐅᕝᕙᓘᓐᓃᑦ ᓄᓇᓖᑦ ᐋᓐᓂᐊᕐᕕᖏᓐᓂ. ᓇᓗᓇᐃᖅᑕᐅᓯᒪᖃᑕᐅᔭᕆᐊᖃᕐᓂᖅ ᓇᓗᓇᐃᒃᑯᑕᖅᑖᖅᓯᒪᔪᓂ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᓯᒪᔪᓂ/ᓄᓇᕗᒻᒥ RNANT/NU ᐊᒻᒪᓗ ᐆᒻᒪᑎᑦᓯᓇᓱᐊᕐᓂᕐᒥᒃ ᖃᓂᒃᑯᑦ (CPR) ᐊᑐᖅᑕᐅᖃᑦᑕᓲᓂᒃ ᐊᕐᕌᒍᑕᒫᖅ ᓇᓗᓇᐃᒃᑯᑕᖅᑖᖑᒋᐊᖃᓲᓂᒃ ᐱᓯᒪᔭᕆᐊᖃᕐᒥᔪᖅ. ᐊᔪᓐᖏᒋᐊᓕᖏᑦ ᓇᓗᓇᐃᖅᑐᖅᑕᐅᓯᒪᒻᒥᔪᑦ ᐃᖅᑲᓇᐃᔮᑦᓴᑦ ᓴᖅᑭᖅᑕᐅᔭᕌᖓᑕ ᑭᓱᓂᒃ ᐊᔪᓐᖏᑕᖃᕆᐊᖃᕐᒪᖔᑕ ᒫᓐᓇ ᐃᖅᑲᓇᐃᔮᒃᓴᐅᔪᓂᒃ ᓴᖅᑭᖅᑕᐅᓯᒪᔪᓂ ᖃᕆᓴᐅᔭᒃᑯᑦ ᐃᑭᐊᖅᑭᔾᔪᑎᑎᒍᑦ ᑕᑯᔭᒃᓴᐅᒻᒥᔪᑦ.

ᐊᖏᕐᕋᕆᔭᐅᔪᒥ ᐋᓐᓂᐊᓯᐅᖅᑏᑦ

ᐊᖏᕐᕋᕆᔭᐅᔪᒥ ᐋᓐᓂᐊᓯᐅᖅᑏᑦ ᐃᑲᔪᖃᑦᑕᖅᑐᑦ ᐃᖢᐊᖅᓴᐃᓂᕐᒥᒃ ᐊᒻᒪᓗ ᐃᑲᔪᕐᓂᕐᒧᑦ ᐱᔨᑦᓯᕋᐅᑎᓂᒃ ᐃᓐᓇᕐᓄᑦ, ᐳᕙᖕᒥᑎᒍᑦ ᖃᓂᒻᒪᓯᓕᓐᓂᒃ ᐊᒻᒪᓗ ᐊᔪᕈᑎᓕᓐᓂᒃ. ᐃᓱᒪᒃᓴᖅᓯᐅᕈᑕᐅᔪᓐᓇᖁᓪᓗᑎᑦ ᐊᖏᕐᕋᕆᔭᐅᔪᒥ ᐋᓐᓂᐊᓯᐅᖅᑎᐅᓂᕐᒥᒃ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓴᕆᔭᐅᔾᔪᑎᖃᕆᐊᖃᖅᑐᑎᑦ ᐅᕝᕙᓘᓐᓃᑦ ᐃᓕᓴᕆᔭᐅᔾᔪᑎᒻᒪᕆᑦᑖᕆᐊᖃᖅᑐᑎᑦ ᖃᐅᔨᓴᕐᓂᓕᕆᓂᕐᒥᒃ ᐋᓐᓂᐊᓯᐅᖅᑎᓄᑦ (BScN), ᐃᓱᓕᓯᒪᓐᖏᑦᑐᒥᒃ ᐆᒻᒪᑎᑦᓯᓇᓱᐊᕐᓂᕐᒥᒃ ᖃᓂᒃᑯᑦ (CPR) ᓇᓗᓇᐃᒃᑯᑕᕐᒥᒃ, ᒫᓐᓇᐅᔪᖅ ᐅᕝᕙᓘᓐᓃᑦ ᐱᔪᓐᓇᖅᓯᓯᒪᓗᑎᑦ ᓇᓗᓇᐃᒃᑯᑕᖅᑖᖅᓯᒪᔪᓂ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᓯᒪᔪᓂ/ᓄᓇᕗᒻᒥ RNANT/NU ᐊᓪᓚᑦᑕᐅᖃᑕᐅᓯᒪᒍᑎᒥᒃ, ᐃᓱᓕᓯᒪᓐᖏᑐᒥᒃ ᐊᖁᑦᑐᖅᓯᐅᑎᒥᒃ ᓚᐃᓴᒥᒃ, ᒪᕐᕉᓐᓂᒃ ᐅᑭᐅᓐᓂᒃ ᐱᓕᕆᐊᖃᓚᐅᖅᓯᒪᓗᑎᑦ ᐊᒻᒪᓗ ᐊᔪᓐᖏᓐᓂᖃᕆᐊᖃᕐᒥᔪᑎᑦ ᐃᖅᑲᓇᐃᔭᕐᓂᕐᒥᒃ ᐃᓕᖅᑯᓯᖃᖃᑎᒌᓐᖏᑦᑐᓂᒃ.

ᒐᕙᒪᒃᑯᑎᒍᑦ ᐋᓐᓂᐊᓯᐅᖅᑎ

ᓄᓇᓕᓐᓂ ᐋᓐᓂᐊᓯᐅᖅᑎ ᐃᑲᔪᖃᑦᑕᖅᑐᖅ ᐃᑲᔪᖅᑕᐅᔭᕆᐊᓕᓐᓂᒃ ᐱᕚᓪᓕᕈᑎᒃᓴᓂᒃ, ᓴᐳᔾᔨᓯᒪᓂᕐᒥᒃ ᐊᒻᒪᓗ ᐅᑎᖅᑎᑦᓯᕙᓪᓕᐊᓇᓱᐊᕐᓂᕐᒧᑦ ᖃᓄᐃᓐᖏᓚᐅᕐᓂᖏᓐᓄᑦ ᐅᖑᒪᑦᓯᔾᔪᑎᑎᒍᑦ ᐊᒻᒪᓗ ᐃᑯᓪᓚᐅᒥᒃᑲᓐᓂᕈᑎᒃᓴᑎᒍᑦ ᖃᓄᐃᒍᑕᐅᔪᓂᒃ ᖃᓂᒻᒪᓯᕐᓂᒃ, ᐊᔪᕈᑎᓂᒃ ᐊᒻᒪᓗ ᑐᖁᓂᕐᒥᒃ. ᐃᓱᒪᒃᓴᖅᓯᐅᕈᑕᐅᔪᓐᓇᖁᓪᓗᑎᑦ ᓄᓇᓕᓐᓂ ᐃᖢᐊᖅᓴᐃᔨᐅᓂᕐᒥᒃ, ᐃᓕᓴᕆᔭᐅᔾᔪᑎᒻᒪᕆᖃᕆᐊᖃᖅᑐᑎᑦ ᖃᐅᔨᓴᕐᓂᓕᕆᓂᕐᒥᒃ ᐋᓐᓂᐊᓯᐅᖅᑎᓄᑦ (BScN) ᐅᕝᕙᓘᓐᓃᑦ ᐊᖏᖅᑕᐅᓯᒪᔪᓂᒃ ᓇᓕᒧᖏᓐᓂᒃ ᖃᐅᔨᒪᓂᐅᔭᕆᐊᓕᓐᓂᒃ, ᐃᓚᖃᕐᓗᓂ ᒥᑦᓯᑎᓐᓃᖏᑦᑐᓂᒃ ᐊᑕᐅᓯᕐ ᒪᕐᕉᓘᓐᓃᑦ ᐊᕐᕌᒎᒃ ᐊᑐᖅᓯᒪᓗᑎᒃ ᐋᓐᓂᐊᓯᐅᖅᑎᓂᒃ ᐱᓕᕆᖃᑎᖃᖅᓯᒪᓂᕐᒥᒃ ᐊᒻᒪᓗ ᐋᓐᓂᐊᓯᐅᖅᑎᐅᓯᒪᓗᑎᑦ ᒐᕙᒪᒃᑯᑎᒍᑦ ᐃᖢᐊᖅᓴᐃᔨᐅᓂᕐᒥᒃ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᐅᔪᓂ ᑕᒪᒃᑯᓄᖓ. ᓇᓗᓇᐃᖅᑕᐅᓯᒪᖃᑕᐅᔭᕆᐊᖃᕐᓂᖅ ᐅᕝᕙᓘᓐᓃᑦ ᓇᓗᓇᐃᖅᑕᐅᓯᒪᔾᔪᑎᑖᕈᒫᕐᓂᐊᕐᓗᑎᑦ ᓇᓗᓇᐃᒃᑯᑕᖅᑖᖅᓯᒪᔪᓂ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᓯᒪᔪᓂ/ᓄᓇᕗᒻᒥ RNANT/NU. ᐆᒻᒪᑎᑦᓯᓇᓱᐊᕐᓂᕐᒥᒃ ᖃᓂᒃᑯᑦ (CPR) ᓇᓗᓇᐃᒃᑯᑕᕐᒥᒃ ᐊᒻᒪᓗ ᐃᓱᓕᓯᒪᓐᖏᑦᑐᒥᒃ ᐊᖁᑦᑐᖅᓯᐅᑎᒥᒃ ᓚᐃᓴᒥᒃ.

ᐋᓐᓂᐊᓯᐅᖅᑎ

ᐋᓐᓂᐊᓯᐅᖅᑏᑦ ᐋᓐᓂᐊᕕᖕᒥ ᐃᖅᑲᓇᐃᔭᖃᑦᑕᖅᑐᑦ ᓯᑕᒪᐅᓕᖅᑲᖓᓪᓗᐊᖅᑐᓂᒃ - ᐅᓂᑦᓯᒪᔪᓄᑦ, ᐋᓐᓂᐊᕐᕕᓕᐊᖅᑕᖅᑐᓄᑦ/ᑐᐊᕕᕐᓇᖅᑐᓕᕆᔨᒃᑯᑦ, ᐋᓐᓂᐊᕐᕕᓕᐊᖅᓯᒪᔪᓂᒃ ᑲᒪᔨᐅᔪᑦ ᐊᒻᒪᓗ ᐱᓚᑦᑐᐃᕕᖕᒥ. ᐋᓐᓂᐊᓯᐅᖅᑏᑦ ᐋᓐᓂᐊᕕᖕᒥ ᐱᓕᕆᖃᑦᑕᖁᔭᐅᓲᖑᕗᑦ ᐊᔾᔨᒌᓐᖏᑦᑐᓂᒃ ᐱᓕᕆᕝᕕᐅᔪᓕᒫᓂ. ᐅᖃᐅᓯᖅᑕᖃᕐᒪᑦ ᐱᓕᒻᒪᒃᓴᕐᓂᕐᒧᑦ ᐋᓐᓂᐊᓯᐅᖅᑏᑦ ᓱᖏᐅᑎᓴᕋᐃᓲᖑᓂᖏᓐᓂᒃ ᐊᔾᔨᒌᓐᖏᑦᑐᓂ ᐋᓐᓂᐊᔪᓂᒃ ᐃᖢᐊᖅᓴᐃᓂᕐᒨᖓᔪᓂᒃ. ᐊᓪᓚᑦᑕᐅᖃᑕᐅᓯᒪᓗᑎᑦ ᐅᕝᕙᓘᓐᓃᑦ ᐱᔪᒃᓴᒫᖑᓗᑎᑦ ᐊᓪᓚᑦᑕᐅᖃᑕᐅᓂᕐᒥᒃ ᓇᓗᓇᐃᒃᑯᑕᖅᑖᖅᓯᒪᔪᓂ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᓯᒪᔪᓂ/ᓄᓇᕗᒻᒥ RNANT/NU ᐊᒻᒪᓗ ᐃᓱᓕᓯᒪᓐᖏᑦᑐᒥᒃ ᐆᒻᒪᑎᑦᓯᓇᓱᐊᕐᓂᕐᒧᑦ ᖃᓂᒃᑯᑦ ᓇᓗᓇᐃᒃᑯᑕᕐᒥᒃ.

ᓇᓗᓇᐃᒃᑯᑕᓕᒃ ᐋᓐᓂᐊᓯᐅᖅᑎ - ᐅᓂᒃᓯᒪᔪᓄᑦ

ᐋᓐᓂᐊᕕᖕᓂ ᐋᓂᐊᓯᐅᖅᑏᑦ ᐊᑐᐃᓐᓇᐅᒪᑎᑦᓯᓲᖑᔪᑦ ᓯᖓᐃᔪᓄᑦ, ᓄᑕᖅᑲᓄᑦ, ᐃᖢᐊᖅᓴᐃᓂᕐᒧᑦ/ ᐱᓚᑦᑐᐃᓂᖅ ᐊᒻᒪᓗ ᐸᓚᖅᓯᒍᑎᒃᓴᓂᒃ ᐋᓐᓂᐊᕐᕕᖕᒦᑦᑐᓄᑦ. ᑭᖑᕝᕕᖅᑎᒌᖃᑦᑕᓲᖑᓪᓗᑎᒃ ᐃᑲᕐᕋᓂᒃ 12-ᓂᒃ ᐃᖅᑲᓇᐃᔭᖃᑦᑕᓲᖑᔪᑦ. ᐅᓂᑦᓯᒪᔪᓄᑦ ᐋᓐᓂᐊᕕᖕᒥ ᐋᓐᓂᐊᓯᐅᖅᑏᑦ ᐃᓕᓐᓂᐊᖅᓯᒪᓂᖃᕆᐊᓖᑦ ᓇᓗᓇᐃᒃᑯᑕᒻᒪᕆᑦᑖᖅᓯᒪᓗᑎᒃ ᒥᑦᓯᑎᓐᓂᐅᖏᑦᑐᖅ ᐊᕐᕌᒍᒥ ᐊᑕᐅᓯᕐᒥᒃ ᒫᓐᓇᒫᖑᓂᖅᐹᒃᑯᑦ ᐱᓕᕆᓯᒪᓗᑎᑦ ᖃᓄᐃᑦᑐᑐᐃᓐᓇᕐᓂᒃ-ᐋᓐᓂᐊᕕᖕᓂ ᐋᓐᓂᐊᕕᓪᓚᑦᑖᓂ ᐅᓂᒃᓯᒪᔪᓂᒃ ᑲᒪᒋᔭᖃᖅᓯᒪᓗᑎᒃ ᐊᒻᒪᓗ ᐃᓱᓕᓯᒪᓐᖏᑦᑐᒥᒃ ᐆᒻᒪᑎᑦᓯᓇᓱᐊᕐᓂᕐᒥᒃ ᖃᓂᒃᑯᑦ (CPR) ᓇᓗᓇᐃᒃᑯᑕᕐᒥᒃ. ᓯᖓᐃᔪᓄᑦ ᐊᒻᒪᓗ ᓄᑕᖅᑲᓄᑦ ᐋᓐᓂᐊᓯᐅᖅᑎᒻᒪᕆᐅᓂᕐᒥᒃ ᐱᔪᒪᓂᖅᐸᐅᕗᑦ.

ᐱᓚᑦᑐᐃᕕᖕᒥ ᐋᓐᓂᐊᓯᐅᖅᑎ

ᐱᓚᑦᑐᐃᕕᖕᒥ ᐋᓐᓂᐊᓯᐅᖅᑏᑦ ᑲᒪᒋᔭᖃᖃᑦᑕᓲᖑᕗᑦ ᐱᓚᑦᑐᐃᕕᖕᒥ ᐊᒻᒪᓗ ᑭᖑᓂᐊᒍᑦ ᐱᓚᑦᑐᖅᑕᐅᓚᐅᖅᑐᖅ ᐅᑕᖅᑭᕕᖓᓂ ᐸᓚᖅᓯᕙᓪᓕᐊᕕᖓᓂ. ᐃᓛᓐᓂᒃᑯᑦ, ᐱᓚᑦᑐᐃᕕᖕᒥ ᐋᓐᓂᐊᓯᐅᖅᑏᑦ ᑲᒪᔭᕆᐊᖃᖅᑎᑕᐅᓲᖑᔪᑦ ᐋᓐᓂᐊᓯᐅᖅᑏᑦ ᐱᓕᕆᐊᒃᓴᕆᓲᖏᓐᓂᒃ ᐃᓐᓇᕐᓄᑦ ᓄᑕᖅᑲᓄᓪᓘᓐᓃᑦ ᓘᑦᑖᓕᐊᕐᕕᐅᓲᓂ. ᐱᓚᑦᑐᐃᕕᖕᒥ ᐋᓐᓂᐊᓯᐅᖅᑏᑦ ᐃᓕᓴᕆᔭᐅᔾᔪᑎᒻᒪᕆᒃᑖᖅᓯᒪᔭᕆᐊᖃᓲᖑᔪᑦ ᐋᓐᓂᐊᓯᐅᖅᑎᐅᓂᕐᒧᑦ, ᐊᒻᒪᓗ ᐃᓱᓕᓯᒪᓐᖏᑦᑐᓂᒃ ᐆᒻᒪᑎᑦᓯᓇᓱᐊᕐᓂᕐᒥᒃ ᖃᓂᒃᑯᑦ (CPR) ᓇᓗᓇᐃᒃᑯᑕᕐᒥᒃ ᐊᒻᒪᓗ ᒥᑦᓯᑎᓐᓂᐅᖏᑦᑐᖅ ᐊᑕᐅᓯᕐᒥᒃ ᐊᕐᕌᒍᒥᒃ ᐱᓚᑦᑐᐃᕕᖕᒥ ᐱᓕᕆᓯᒪᓗᓂ. ᐃᓕᓐᓂᐊᕐᓂᖃᖅᓯᒪᑉᐸᑦ ᐃᓕᓴᕆᔭᐅᔾᔪᑎᑖᖅᓯᒪᓗᓂ ᐱᓚᑦᑐᐃᕕᖕᒦᓂᕐᒥᒃ ᐊᑐᕐᓂᖃᒻᒪᕆᒐᔭᖅᑐᖅ.

ᑐᐊᕕᕐᓇᖅᑐᓕᕆᔨ/ᓘᑦᑕᓕᐊᖃᑦᑕᖅᑐᓄᑦ ᐋᓐᓂᐊᓯᐅᖅᑎ

ᐋᓐᓂᐊᓯᐅᖅᑏᑦ ᑐᐊᕕᕐᓇᖅᑐᓕᕆᕕᖕᒥ/ᓘᑦᑖᓕᐊᖃᑦᑕᖅᑐᓄᑦ ᐱᓕᕆᕝᕕᐅᔪᒥ ᑲᒪᖃᑦᑕᓲᖑᔪᑦ ᐋᓐᓂᐊᕐᕕᓕᐊᖅᓯᒪᔪᓂᒃ ᑐᐊᕕᕐᓇᖅᑐᓂᒃ ᐊᒻᒪᓗ ᑐᐊᕕᕐᓇᖅᑐᓕᕆᐊᖑᔭᕆᐊᓕᓐᓂᒃ ᐋᓐᓂᐊᕐᕕᓕᐊᖅᑕᖅᑐᓂᒃ. ᐋᓐᓂᐊᓯᐅᖅᑎᐅᓂᕐᒧᑦ ᓇᓗᓇᐃᒃᑯᑕᒻᒪᕆᐅᔪᒥᒃ ᐊᒻᒪᓗ ᐃᓱᓕᓯᒪᓐᖏᑦᑐᓂᒃ ᒫᓐᓇᕐᓂᓴᐅᓂᖅᐹᖑᔪᓐᓇᖅᑐᒥᒃ ᐆᒻᒪᑎᑦᓯᓇᓱᐊᕐᓂᕐᒥᒃ ᖃᓂᒃᑯᑦ (CPR) ᓇᓗᓇᐃᒃᑯᑕᖅᑖᖅᓯᒪᒋᐊᓖᑦ ᒥᑦᓯᑎᓐᓂᐅᖏᑦᑐᖅ ᒪᕐᕉᓐᓂᒃ ᐅᑭᐅᓐᓂᒃ ᒫᓐᓇᕐᓂᓴᐅᓂᖅᐹᒥᒃ ᐋᓐᓂᐊᕕᓪᓚᑦᑖᒥ ᐃᖢᐊᖅᓴᐃᔨᐅᓯᒪᓗᓂ, ᐃᓚᒋᔭᐅᓪᓗᓂ ᒥᑦᓯᑎᓐᓂᐅᖏᑦᑐᖅ ᐊᑕᐅᓯᕐᒥᒃ ᐊᕐᕌᒍᒥ ᑐᐊᕕᕐᓇᖅᑐᓕᕆᕕᖕᒥ ᐱᓕᕆᓯᒪᓗᓂ, ᐊᑐᖅᑕᐅᓯᒪᓪᓚᑦᑖᕆᐊᓖᑦ. ᐱᔪᒋᔭᐅᓂᖅᓴᐅᔪᑦ ᑕᐃᒃᑯᐊ ᐋᓐᓂᐊᓯᐅᖅᑏᑦ ᐱᐊᓂᒃᓯᒪᔪᑦ ᐃᓕᓐᓂᐊᓂᕐᒥᒃ ᐋᓐᓂᐊᕐᕕᓕᐊᖅᑐᓂᒃ ᖃᐅᔨᓴᕐᓂᕐᒥᒃ, ᖁᐊᖅᓵᓇᖅᑐᓕᕆᓂᕐᒥᒃ, ᐆᒻᒪᓯᑦᑐᓕᕆᓂᕐᒥᒃ ACLS ᐊᒻᒪᓗ ᓄᑕᖅᑲᓄᑦ ᑐᖁᓕᒑᔪᓂᒃ PALS ᐃᓅᓕᓴᐃᓂᕐᒥᒃ.

ᐊᓯᖏᑦ ᐋᓐᓂᐊᓯᐅᖅᑎᐅᓂᕐᒧᑦ ᐊᖏᔪᖅᑲᓄᑦ, ᐋᓐᓂᐊᕕᖕᒥ ᐃᓕᓐᓂᐊᑎᑦᓯᔨᐅᓂᖅ, ᐃᕐᓂᓱᑦᓰᔨᐅᓂᖅ, ᐋᓐᓂᐊᓯᐅᖅᑎᒻᒪᕆᐅᓂᒃ ᐊᒻᒪᓗ/ᐅᕝᔭᓘᓐᓃᑦ ᐊᔪᓐᖏᑕᐅᔭᕆᐊᓕᓐᓂᒃ ᐃᓕᓐᓂᐊᖅᓯᒪᔪᓄᑦ ᐋᓐᓂᐊᓯᐅᖅᑎᐅᓂᕐᒥᒃ ᓲᕐᓗ ᐃᓱᒪᓕᕆᓂᕐᒧᑦ ᐊᑐᐃᓐᓇᐅᔪᐃᓐᓇᐅᒻᒥᔪᑦ.